جان کا خطرہ

لکھنؤ : سماج وادی پارٹی میں اختلافات کے درمیان پارٹی کے جنرل سکریٹری امر سنگھ نے پہلی مرتبہ خود پر عائد الزامات پر کھل کر بات چیت کی۔ اس دوران ان کا درد بھی چھلک آیا ہے۔ امر سنگھ نے کہا کہ اکھلیش کے دلال کہے جانے سے وہ کافی دکھی ہیں۔ امر سنگھ نے کہا کہ وزیر اعلی اکھلیش یادو ہمیشہ غلط لوگوں سے گھرے رہے ہیں۔ انہوں نے یہ بھی کہا کہ وہ مرتے دم تک ملائم کے ساتھ ہیں اور اکھلیش کے ساتھ بھی ہمیشہ رہیں گے۔ انہوں نے اکھلیش یادو کے الزامات کا جواب دیتے ہوئے کہا کہ انہوں نے مجھے دلال کہا، جس سے مجھے کافی دکھ ہوا۔ جب پورا خاندان اکھلیش کی شادی کے خلاف تھا ، تب میں نے ان کا ساتھ دیا تھا۔ اس کی شادی کی کوئی تصویر نہیں ہے ، جس میں یہ 'دلال



نہ ہو۔ انہوں نے کہا کہ میں وزیر اعلی اکھلیش یادو کا ساتھ دوں یا نہ دوں ، لیکن ملائم سنگھ یادو کے بیٹے کا ساتھ ہمیشہ دوں گا۔ امر سنگھ نے کہا کہ میں نے نیتا جی سے کہا تھا کہ اگر میری قربانی سے پارٹی میں سب کچھ ٹھیک ہو جائے گا ، تو میں اس کے لئے تیار ہوں۔ امر سنگھ نے رام گوپال یادو پر بھی جم کر نشانہ سادھا ۔ انہوں نے رام گوپال یادو کو دبنگ قرار دیا ۔ امر سنگھ نے کہا کہ رام گوپال یادو پہلے بھی مجھے پارٹی سے نکلوا چکے ہیں۔ انہوں نے پھر سے بیان دیا کہ وہ مجھے پارٹی سے نکلوا دیں گے۔ رام گوپال کو دبنگ بتاتے ہوئے امر سنگھ نے ان سے اپنی جان کو خطرہ قرار دیا۔ انہوں نے کہا کہ میں ان سے بہت ڈر گیا ہوں، میری چھوٹی چھوٹی بیٹیاں ہیں وہ یتیم ہو جائیں گی۔